Madaxweynaha Ukraine Volodymyr Zelensky ayaa sheegay inuusan wax raalli gelin ah u haynin dhiggiisa Mareykanka, Donald Trump, saacado kaddib muran afka ah oo dhex maray iyaga oo ay kamaraduhu duubayeen gudaha Aqalka Cad.

Zelensky, oo wareysi siiyay kanaalka “Fox News” fiidkii Jimcaha, ayaa yiri: “Waan ixtiraamayaa madaxweynaha (Trump) iyo shacabka Mareykanka.” Markii wariyuhu weydiiyay haddii uu diyaar u yahay inuu Trump ka raalli geliyo, wuxuu ku jawaabay: “Waxaan aaminsanahay in la furo wadahadal daacad ah, waana hubaa inaanan sameyn wax khalad ah.”

Wuxuu sidoo kale xusay in xiriirka labada dal la hagaajin karo, maadaama uu yahay mid ka weyn labada madaxweyne oo keliya, wuxuuna ku tilmaamay xiriir adag oo taariikhi ah oo ka dhaxeeya labada shacab. Wuxuu intaa ku daray inuusan rabin inuu Mareykanka lumiyo maadaama uu yahay xulafadiisa muhiimka ah.

Madaxweynaha Ukraine ayaa sheegay inay noqon doonto “adagtahay” in dalkiisu ku guuleysto dagaalka ama iska caabiyo Russia haddii ay joojiyaan gargaarka Mareykanka. Hadalkan wuxuu yimid saacado kadib markii dhiggiisa Mareykanka uu ku hanjabay inuu ka fariisan doono taageerada Kyiv haddii aysan tanaasul ka sameyn heshiiska Moscow.

Zelensky wuxuu yiri: “Waxay noqon doontaa mid adag la’aantiin, laakiin ma lumin karno qiyamkayaga iyo dadkayaga. Ma lumin karno xorriyaddeenna.” Wuxuu sidoo kale carrabka ku adkeeyay in Ukraine “aysan rabin inay lumiso” taageerada Mareykanka.

Heshiiska ku saabsan ka faa’iidaysiga wadajirka ah ee kheyraadka macdanta Ukraine, oo Zelensky u tagay Washington, lama saxiixin. Sidoo kale, waxaa la baajiyay shir jaraa’id oo ay wada qaban lahaayeen labada madaxweyne. Si kastaba ha ahaatee, Trump ayaa bartiisa “Truth Social” ku qoray in “martidiisa dib u soo laaban karto marka uu diyaar u yahay nabadda.”

Trump, oo la hadlayay warbaahinta xilli uu ka baxayay Aqalka Cad si uu fasaxa dhammaadka usbuuca ugu qaato Florida, wuxuu sheegay in “Zelensky si xad dhaaf ah u qiimeeyay mowqifkiisa” intii ay murmayeen.

Zelensky wuxuu si lama filaan ah uga baxay Aqalka Cad Jimcaha kadib muran afka ah oo aan horay loo arag oo dhex maray isaga iyo Trump gudaha xafiiska Oval-ka. Trump wuxuu ku hanjabay inuu ka tageyo Ukraine haddii aysan tanaasul sameyn si loo xalliyo khilaafka kala dhaxeeya Russia.

guuji