Waxaa jira hadal heyn badan oo ka dhalatay jawaabtii Ilhaan Cumar ay ka bixisay baaqa xildhibaan ka tirsan Congress-ka Mareykanka oo dalbanayay in laga masaafuriyo dalkaas, laguna celiyo
Waxaa jira hadal heyn badan oo ka dhalatay jawaabtii Ilhaan Cumar ay ka bixisay baaqa xildhibaan ka tirsan Congress-ka Mareykanka oo dalbanayay in laga masaafuriyo dalkaas, laguna celiyo Soomaaliya.
Xildhibaanka cusub ee Kongareeska Mareykanka Brandon Gill, oo ka tirsan xisbiga Jamhuuriga ee laga soo doortay gobolka Texas, ayaa sheegay in Mareykanku noqon lahaa meel ka wanaagsan haddii Ilhaan Cumar la masaafuriyo. Hadalkan ayaa yimid xilli Trump uu dadaal ugu jiro hirgelinta qorshihiisa adag ee masaafurinta.
Gill ayaa sii xoojiyay baaqiisa kadib markii uu ka falceliyay muuqaal fiidiyow ah oo lagu faafiyay baraha bulshada, kaas oo laga soo xigtay wareysi ay bixisay Ilhaan. Wuxuu ku eedeeyay Ilhaan in aysan daacad u ahayn Mareykanka, isagoo bartiisa X ku qoray: “Waligeed maahayn inaan u ogolaano Ilhaan Cumar inay timaado dalkeena.”
Jawaabta Ilhaan Cumar ee dhalisay doodda
Ilhaan oo wareysiga kaga jawaabeysay hadalka Gill, ayaa si adag uga falcelisay, iyadoo tiri: “Dadkani waa doqonno. Waxaan joogaa heer aan dareemayo in ay adag tahay in la la yeesho dood maangal ah sababtuna waa heerka nacasnimadooda. Waxay soo bandhigayaan maalin kasta waa wax laga xishoodo, ma aha kaliya Kongareeska dhexdiisa, laakiin Maraykan ahaan.”
Waxay intaa raacisay: “Xaqiiqda ah in dadkan loo oggolaaday inay ku hadaaqaan waxyaabo laga yaqyaqsado waxay kuu sheegaysaa nacasnimada Mareykanka timid. Sidee kale ayaan mar labaad ku heli lahayn madaxweynenimada Trump?”
Hadalka Ilhaan Cumar ayaa caro xooggan ka dhaliyay xubno ka tirsan xisbiga Jamhuuriga, oo u arkay hadal gef ku ah dadka Mareykanka, gaar ahaan taageerayaasha Trump. Xildhibaan Greg Steube oo laga soo doortay gobolka Florida ayaa ku jawaabay: “Aqlabiyadda dadka Mareykanku waa dad hawlkar ah oo caqli badan, laakiin dadka adiga oo kale ah oo ku dhaca been kasta waxay u ekeysiiyaan dadka Maraykanka kuwo doqono iyo nacasyo ah.”
Suurtagalnimada in Ilhaan laga saaro Kongareeska
Marar badan ayaa xubnaha Jamhuuriga waxay dalbadeen in Ilhaan Cumar laga saaro Kongareeska, laakiin arrintaasi waa mid aad u adag. Qareen Amiin Haruun oo ka howlgala Minnesota ayaa xusay in “Ma ahan wax fudud in xildhibaan la soo doortay laga eryo baarlamaanka. Way ka adag tahay doorashada.”
Tiradii ugu dambeysay ee xildhibaano laga saaro Kongareeska Mareykanka waxay ahayd George Santos oo xisbiga Jamhuuriga ka tirsanaa, kaasoo lagu helay dacwado musuqmaasuq iyo been abuur. Labadii xildhibaan ee ka horreeyay, James Traficant iyo Michael Myers, ayaa iyaguna laga saaray baarlamaanka sababo la xiriira laaluush iyo falal sharci-darro ah.
Si xildhibaan looga saaro Kongareeska, waxaa loo baahan yahay in labo meelood saddex meel cododka aqalka la helo, taasoo ah arrin adag. Dastuurka Mareykanka wuxuu ilaaliyaa rabitaanka cod-bixiyayaasha, taasoo ka dhigaysa in aysan suurtagal ahayn in Ilhaan Cumar si sahlan looga saaro baarlamaanka.
Waxaa muuqata in baaqyada ka dhanka ah Ilhaan Cumar aysan wax badan ka beddeli doonin xaaladaheeda siyaasadeed, maadaama Jamhuurigu aysan heli karin codad ku filan oo ay ku meel mariyaan qorshahaas.
