Unitree G1: Robot u Eg Bani’aadam oo Sameynaya Dhaqdhaqaaqyo Kung-Fu Shirkadda robot-yada ee Shiinaha Unitree ayaa soo bandhigtay robot cusub oo la yiraahdo G1, kaas oo leh muuqaal bani’aadam oo sameyn
Shirkadda robot-yada ee Shiinaha Unitree ayaa soo bandhigtay robot cusub oo la yiraahdo G1, kaas oo leh muuqaal bani’aadam oo sameyn kara dhaqdhaqaaqyo fanka dagaalka ah sida kung-fu. Muuqaal dhowaan la daabacay ayaa muujinaya robot-kan oo la mid ah ilmo yar, kuna tuuraya feer hawada iyo laad wareeg ah.
Shirkadda ayaa ku faantay horumarka ay ku sameysay robot-kan, iyadoo ku tilmaantay qoraal ku lifaaqan fiidiyowga:
“Waxaan sii wadnay horumarinta xisaabta (algorithm) robot-ka Unitree G1, taasoo u ogolaatay inuu barto oo uu sameeyo ku dhawaad dhaqdhaqaaq kasta.” Waxay sidoo kale uga digtay isticmaaleyaasha inay ka taxadaraan, kuna tiri: “Fadlan ka fogow robot-ka si aad u sugnaato.”
Robot-kan G1 wuxuu tusaale u yahay horumarka la gaadhay ee dhinaca robot-yada, gaar ahaan kuwa loogu talagalay isticmaalka macaamiisha. Ka duwan shirkadaha kale, sida Tesla oo diiradda saaraya robot-ka Optimus, Unitree ayaa bilaabay inay suuq geyso robot-kan G1, kaas oo qiimihiisu ka bilaabanayo $16,000.
Robot-kan waxa uu leeyahay inta u dhaxaysa 23 ilaa 43 matoor, kuwaas oo wada shaqeynaya si uu ugu dhaqaaqo qaabab kala duwan sida socod, boodbood, iyo xitaa inuu qaab bini’aadam ku sameeyo dhaqaaqyo dagaal.
Muuqaal hore oo la sii daayay ayaa muujinaya robot-ka G1 oo sameynaya dhaqdhaqaaqyo madadaalo ah sida ciyaar iyo qoob ka ciyaar, halka injineer isku dayayo inuu dhulka ku tuuro isagoo adeegsanaya ul. Muuqaal kale oo lasoo saaray bishii hore ayaa muujinaya robot-kan oo ordaya waddo iyo sidoo kale si habsami leh ugu socda dhagxaan aan sinnayn.
Sidoo kale, mid ka mid ah isticmaaleyaasha YouTube, Suhail Khan, ayaa soo dhigay muuqaal uu ku tijaabinayo robot-kan, isagoo ku amray inuu gadaal u dhaco ka dibna uu mar kale istaago.
Shirkadda Unitree ayaa sidoo kale soo bandhigtay robot-yo kale oo casri ah, sida B2 iyo Go2, kuwaas oo leh qaab eey oo leh 7 lugood. Robot-ka Go2 waxaa laga iibsan karaa wax ka yar $2,000, halka robot-ka Spot Mini ee ay sameysay shirkadda Boston Dynamics uu qiimihiisu gaarayo $75,000.
Warbixin ay daabacday mareegta Futurism ayaa xustay in robot-ka G1 uu weli u nugul yahay inuu dhaco marka la tijaabinayo isku dheelitirkiisa, taas oo ka dhigan in weli aysan jirin cabsi dhab ah oo ah inuu robot-ku si dhab ah ugu halis geliyo bini’aadam.
