Boqortooyada Ingiriiska iyo Ukraine ayaa ku heshiiyay maalgelin dhan 2.2 bilyan oo gini istarliin (2.8 bilyan oo doolar), taasoo lagu xoojinayo awoodda difaaca milatariga ee Kyiv. Heshiiskaan ayaa
Boqortooyada Ingiriiska iyo Ukraine ayaa ku heshiiyay maalgelin dhan 2.2 bilyan oo gini istarliin (2.8 bilyan oo doolar), taasoo lagu xoojinayo awoodda difaaca milatariga ee Kyiv. Heshiiskaan ayaa dhacay kaddib booqasho uu Madaxweynaha Ukraine, Volodymyr Zelensky, ku tagay London, halkaas oo si diirran loogu soo dhaweeyay. Arrintan ayaa sidoo kale ku soo beegantay kaddib kulan muhiim ah oo uu Zelensky Jimcihii la yeeshay Madaxweynaha Mareykanka ee Aqalka Cad.
Wasiirrada Maaliyadda ee labada dal, Rachel Reeves iyo Serhiy Marchenko, ayaa si rasmi ah u saxiixay heshiiska deynta intii lagu guda jiray kulan muuqaal ah oo dhex maray Ra’iisul Wasaaraha Ingiriiska, Keir Starmer, iyo Madaxweynaha Ukraine, Volodymyr Zelensky, kaasoo ka dhacay London. Deyntan waxaa la qorsheynayaa in lagu maalgeliyo faa’iidada laga kasbado hantida dawladeed ee Ruushka ee la xannibay.
Dhinaca kale, dad badan ayaa isugu soo baxay bannaanka xafiiska Ra’iisul Wasaaraha Ingiriiska (Downing Street) si ay u soo dhaweeyaan wefdiga Zelensky. Starmer ayaa si kalgacal leh u qaabilay Zelensky, kuna yiri, “Aad baad halkan ugu soo dhawaatay, qiimo weyn ayaad leedahay.”
Markii kulanku furmayay, Starmer ayaa sheegay: “Waxaan rajeynayaa inaad maqashay; shacabka Ingiriiska waxay u istaageen inay muujiyaan taageeradooda adiga iyo Ukraine.”
Wuxuu xusay in dalkiisu si go’aan leh uga go’an tahay inuu sii wado taageerada Kyiv ee dagaalka ka dhanka ah Moscow.
Zelensky ayaa muujiyay qanacsanaantiisa, isagoo tilmaamay inuu “si weyn ugu faraxsan yahay iskaashigan istiraatiijiga ah.”
Starmer wuxuu yiri: “Waxaan rajaynayaa inaad maqashay; shacabka Ingiriiska waxa ay u istaageen si ay kuu muujiyaan taageeradooda adiga iyo Ukraine.”
Ra’iisul Wasaaraha Ingiriiska ayaa Jimcihii fiidkii ku adkeystay inuu si buuxda u garab taagan yahay Madaxweynaha Ukraine, kaddib markii Zelensky uu khilaaf soo kala dhexgalay Madaxweyne Donald Trump intii uu ku sugnaa Aqalka Cad. Trump ayaa hanjabay inuu joojin doono taageerada Ukraine haddii ay heshiis nabadeed la galaan Ruushka.
Inkasta oo muran uu hareeyay kulankaas, Madaxweynaha Ukraine, Volodymyr Zelensky, ayaa barta “X” ku sheegay in ay “dowladda Ukraine u tahay mid muhiim ah in la helo taageerada Madaxweyne Trump.”
Wuxuu sidoo kale tilmaamay in “taageerada Mareykanka ay door muhiim ah ka ciyaartay sii jiritaankeenna,” isagoo markale carrabka ku adkeeyay diyaaradda Kyiv inay “saxiixdo heshiiska macdanta,” taas oo noqon doonta tallaabo muhiim ah oo lagu xaqiijinayo dammaanadda amniga.
Madaxweyne Donald Trump ayaa abuuray walaac weyn oo ku dhex faafay xulafadiisa Yurub, kaddib markii uu wada-hadal la yeeshay Madaxweynaha Ruushka, Vladimir Putin, si uu ugu dadaalo helitaanka xal nabadeed oo ku saabsan xaaladda Ukraine.
Mowqifkiisa cusub ee u janjeeraya Ruushka ayaa walwal xooggan ku abuuray xulafada reer Galbeedka. Walaacyadaasi ayaa sii xoogaystay Jimcihii markii khilaaf uu ka dhex qarxay Aqalka Cad, taas oo sare u qaadday cabsi laga qabo in siyaasadda Mareykanka ee ku aaddan taageerada Ukraine ay wiiqanto, iyadoo xiisadda laga dhaxlay duullaankii Ruushka ee Ukraine ay weli taagan tahay.
