Madaxweynihii hore ee Soomaaliya, Maxamed Cabdullaahi Farmaajo, ayaa war kasoo saaray howlgallada ay Ciidamada Qaranka Soomaaliyeed ka wadaan gobollada dalka, gaar ahaan Shabeellaha Dhexe. Wuxuu ugu baaqay shacabka
Madaxweynihii hore ee Soomaaliya, Maxamed Cabdullaahi Farmaajo, ayaa war kasoo saaray howlgallada ay Ciidamada Qaranka Soomaaliyeed ka wadaan gobollada dalka, gaar ahaan Shabeellaha Dhexe. Wuxuu ugu baaqay shacabka Soomaaliyeed in ay garab istaagaan ciidamada geesiyaasha ah ee dagaalka kula jira argagixisada Al-Shabaab.
Farmaajo ayaa si cad u sheegay in taageerada loo muujinayo ciidamada aysan ahayn arrin mucaaradnimo ama muxaafidnimo, balse ay tahay waajib qaran iyo masuuliyad taariikhi ah. Wuxuu hoosta ka xarriiqay in dhammaan shacabka Soomaaliyeed ay xil ka saaran tahay inay ku garab istaagaan ciidamada dadaalka ugu jira badbaadinta dalka.
Wuxuu sidoo kale xusay in dhaqdhaqaaqyada argagixisada Al-Shabaab ee ka socda Shabeellaha Dhexe ay caddeyn u yihiin sida kooxahaasi uga faa’iideysanayaan khilaafaadka siyaasadeed iyo xasillooni la’aanta ka jirta dalka.
Madaxweynihii hore wuxuu ugu baaqay Dowladda Federaalka Soomaaliya in ay xoogga saarto midnimada iyo wadajirka ummadda Soomaaliyeed. Wuxuu sheegay in khilaafaadka siyaasadeed ee jira ay caqabad weyn ku yihiin dagaalka ka dhanka ah argagixisada, loona baahan yahay xal degdeg ah si loo xoojiyo howlgallada sifeynta dalka.
Wuxuu sidoo kale bogaadiyey ciidamada ammaanka Puntland oo dagaal kula jira kooxaha argagixisada ah ee ku dhuumaaleysanaya buuraha Cal-Miskaad, isagoo ku dhiirrigeliyey inay sii xoojiyaan dagaalka ka dhanka ah Al-Shabaab iyo Daacish
Farmaajo wuxuu shacabka ugu baaqay in ay si buuxda u garab istaagaan ciidamada, isla markaana ay feejignaadaan si aysan ugu dhicin dacaayadaha iyo marin-habaabinta ay faafinayaan kooxaha argagixisada ah. Wuxuu carabka ku adkeeyey in dadaallada lagula dagaalamayo kooxahaasi ay u baahan yihiin isku-duubni qaran si Soomaaliya ay u hesho nabad waarta.
Ugu dambeyn, Madaxweynihii hore wuxuu mar kale xusay muhiimadda ay leedahay in la mideeyo dadaallada lagu ciribtirayo argagixisada, si shacabka Soomaaliyeed ay ugu noolaadaan nabad iyo xasilooni, loona ilaaliyo sharaf iyo qaranimo buuxda.
Hadalka kasoo yeeray Maxamed Cabdullaahi Farmaajo wuxuu muujinayaa sida ay muhiim u tahay midnimada, wadajirka shacabka iyo dadaalka lagu ciribtirayo kooxaha argagixisada ah. Taageerada ciidamada, mideynta dadaallada iyo xoojinta xasilloonida siyaasadeed waa tallaabooyin lagama maarmaan u ah mustaqbalka nabadeed ee Soomaaliya
